روحوا شرم الشيخ يا جماعة. لازم تروحوا شرم وتروحوا فندق عايدة في الهضبة تحديداً.
هحكي معاكم تجربتي الأخيرة هناك..
أنا بسافر كتير ورحت شرم الشيخ قبل كدة كتير جداً.
هناك تحس كأنك في كوكب تاني مش في مصر. السواقة كل واحد ماشي في حارته بالظبط ومفيش حد بيكسر علي حد بالعكس كل واحد بيعدي التاني بمنتهي الشياكة والانسيابية.
الشارع امان بشكل تحفه بتلاقي في كل مكان الشرطه كماين وبتنظم المرور.
مع إني لفيت دول كتير في حياتي، شرم دايماً بحس لها طعم خاص ومذاق مختلف عن أي مكان في العالم.
لكن أجمل حاجة بقى إنك تروح فندق ٣ نجوم بس تاخد خدمة ٥ نجوم، وتتعامل كأنك VIP، حتي لو انت مجرد نزيل عادي ومش هيشوفوك تاني.
فندق عايدة بالهضبة – شرم الشيخ
كنت في فندق ٤ نجوم حجزاه من القاهرة لكن للأسف ما ارتحتش فيه، فبدأت أدور بسرعة على مكان تاني. جربت بالصدفة أدخل فندق إسمه عايدة في الهضبة.
قابلت هناك الأستاذ / ماهر المسئول عن الاستقبال والحجوزات.
إدانا إهتمام كبير جداً، وأصر يفرجنا على الغرف وحمام السباحة و view البحر من فوق. بالرغم من إني مكنتش لسة عرفته بنفسي حتى.
الحقيقة المكان أول ما تدخله تحسه مريح وعريق يجمع بين عبق الماضي وجمال الحداثة في شرم.
قررت أغير اقامتي تاني يوم وروحت فعلاً هناك، وبالرغم إني اضطريت بعد ٤ أيام أرجع القاهرة لظروف شغلي، لكن بنتي من حلاوة المكان وتعامل الناس هناك مدت الاقامة ٤ ايام كمان.
- أولاً شفت أحلي خدمة من سيد في ال housekeeping. بيعمل كل حاجة تطلبها بابتسامة.
وكل يوم يفاجئنا بحاجة مختلفة في الغرفة.
- كلنا ألذ وأطعم أكل وشوفنا أشيك تعامل من الاستاذ/ أيمن مسئول المشروبات والتغذية.
أثناء الأكل دايماً يعدي يسألنا لو محتاجين أي حاجة. ولقيته بيعمل كدة مع كل النزلاء، على طول مهتم إن كل اللي قاعدين واخدين أفضل خدمة.
ده غير staff البوفيه اللي على طول مبتسمين وتعاملهم لطيف. حقيقي حسيت بسعادة كبيرة ان مستوى الخدمة عندنا حلو قوي كدة.
- أما استاذ/ ماهر دة حكاية تانية، الابتسامة مش بتفارقه طول ما هو بيكلمك، من أول اليوم إلى أخر اليوم.
حتى وهو مرهق والتعب ظاهر عليه بس بردو مبتسم، ويقولك طول الوقت إحنا هنا علشان راحتكم احنا كل همنا تنبسطوا بس.
بشوش وبيحل أي مشكلة توصل له في الدقيقة اللي تطلبها منه فيها. ودايماً بيحاول يعمل أكتر كمان من اللي بتطلبه.
براڤو فريق عمل فندق عايدة بالهضبة. حقيقي انبسطنا جداً معاكم وأكيد هنكرر الزيارة كتير!
الفندق كمان كموقع هو بيشوف تقريباً شرم الشيخ كلها من فوق، فالمنظر من فوق حاجة تانية سواء الصبح أو بالليل.
ده غير إن ليه شاطئين مختلفين على البحر، شاطئ رملي و شاطئ صخري.
بجد كانت تجربة جميلة جداً. وبدعوا كل أصحابي واللي بيحبوا السياحة إنهم ينزلوا في فندق عايدة الهضبة في شرم الشيخ.
أسيبكم مع بعض الصور من الرحلة 🥰
والغواصة دي تحديداً لسة فيه كلام وصور وفيديوهات كتير عنها فى المقال الجاي ان شاء الله.
