أهلا بكم فى الركن الأدبي
السلام عليكم رواد موقعي الأفاضل وصباحكم فل ومسائكم ورد وياسمين
انا بحب قوي عائلتي الصغيره وبحب قوي وطني الكبير مصر، وبحبكم كلكم من غير ما اشوفكم وامنيتي اساعد كل حد أقدر أقدم له شيء من العلم او النصيحه والمشوره لاي انسان محتاج يسال يعمل ايه في مشكلته او محتاج يفضفض مع حد
وكل خدماتي علي موقعي هنا من الان ولاخر عمري هتكون مجانيه تماما 100 ٪
بالنسبه للعيادة ده شغلي التقليدي وطبعا بمقابل مادي ولكن بسعر عادي في متناول الجميع
وفيه فئات مستثناه حتي في العيادة
بمعني العلاج مجاني تماما بالنسبه لاقارب الدرجه الاولي لكل اسر الشهداء من الجيش والشرطه كنوع من الاعتراف بالجميل ووفاء لهم
وفيه خصومات تصل الي ٥٠٪ لبعض الفئات الاخري
من الاخر في عيادتي الرحمه قبل العدل
يعني العدل والحق اني اخد قيمه عملي وتكلفته العاليه جدا في المكان الي انا فيه
ولكن عندي الرحمه مكانها الاول يعني لو محتاج العلاج وفعلا مش معاك ثمن الكشف
فمن فضلك ماتترددش واتصل علي رقم الحجز وقول/ي انا جاي/ة وعايز/ة احجز كشف مجاني، هتلاقي لك مكان عندنا ان شاءالله
الموقع الطبي الاساسي وملحق به هذا الموقع الادبي.. حبيت اعتبركم عائلتي الكبيرة ونفضفض سوا ونتبادل الخبرات
كمان من خلال الموقع فقط بقدم خدمه المساعده في حل المشاكل المرتبطه بعلاقتنا مع الاخرين واوعدكم ان سركم في بير
انا هنا فقط للمساعده ولا توجد لي اى هدف او مصلحه غير المشاركه المجتمعيه وانى اكون ايجابيه بشكل عملي
وانقل لكم قصصي وحكاياتي في دول كتيره زرتها واتعاملت مع ناسها
حبيت نتشارك الهوايات لانى بعتبر نفسي مجموعه هوايات اتركب عليهم انسانة
لعبت رياضات الكراتيه والكنغو فو والتايكوندو
عزفت عود وحاولت اتعلم اورج وإتعلمت غناء
بكتب شعر وقصص من الطفوله المبكره واثقلت الموهبة دي في الكبر بتعلم كتابة السيناريو السينمائي بشكل احترافي
من الرواد الدائمين للأوبرا المصرية بكل ما تقدمه من اعمال اجنبيه او شرقيه اصيله او مديح
والغريب انى بتذوق كل ده بنفس القدر
تعالو نربط الاحزمه ونبدا سوا نحلق في سماء رحلتي مع الحياة
بحبكم كلكم يا عيلتي الكبيره الجميلة قوي
نتقابل دائما علي خير وود واحترام
د/ سحر عبدالعال حامد
الوطنية والفن.. كلاهما إحساس متدفق ومشاعر فياضة
د. سحر حامد
