مثلث برمودا
مثلث برمودا ليس فقط موجود علي الخريطه لكنه يمكن ان يوجد في حياة اي انسان لو مر بهذه المرحلة وهي المرحلة الفحلوقية
اه والله زى ما بقولك كده هي مرحله لونها فحلوقي يعني ملهاش لون قابل للوصف ولا حد يعرف يتخيله والمثلث ده مدمر لو دخلت جواه غالبا خلاص عليه العوض ومنه العوض فيك
لكن الناجي منه فقط هو الي يقدر يهرب من دخوله يعني اما يلاقي نفسه داخل عليه يعمل قفزه حره سريعه ويعدي من فوقه ومش مهم حتي لو اتكسر او اتعور او اتبهدل في النطه مش مهم خالص لان اي جروح او كسور في جسمه في يوم من الايام مسيرها تخف وتلتئم لكن لو دخل مثلث الموت مش هيكون له رجعه
المثلث ده هو المنطقه الفاصله بين الحب والكراهيه وبين اليأس والامل وبين التشاؤم والتفائل
يعني لما تكون بتحب فانت انسان طبيعي عايش احاسيك ولما بتكره فانت برضه انسان طبيعي وقررت الهروب والاعتراف بالضعف والهزيمه امام الحب ووقعت في مشاعر الكراهيه
ولو بقيت لا بتحب ولا بتكره وكبرت دماغك فانت ما زلت انسان طبيعي وقررت تلغي مشاعرك ولو مؤقتا
لكن الخطر كل الخطر انك تقع في مسلسل الرعب والضياع المسمي بمثلث برمودا ( انا بسميه كده مجازا طبعا )
وهو انك تبقي غارق في الحب والشوق لكن متعذب وموجوع لانك عارف انه حب فاشل او مستحيل او ان الطرف الاخر حقير او خائن او فيه صفه تخليه ميستحقش حبك ده
لكن لا انت عارف تكرهه ولا عارف تنساه ولا عارف توقف شوقك وحبك له
بتتحول لحاله من الجمود الخارجي والبراكين والثورات الداخليه
لا انت بالهادئ المستريح ولا انت بالثائر المنفجر
انت صلب قوي بس قشره وهادي قوي بس زى هدوء قبل العاصفه ومن جواك زى الاسد الهائج لكن محبوس في جسم ارنب
انت بتبقي حاجه كده لا هي جنه ولا نار ولا بينهم انت بتبقي جسد متحرك وميت ويائس بس جواك حروب وزلازل وبراكين بتغلي في دمك وقلبك
المرحله دي اصعب من الموت واغبي من الكراهيه
اصلا متسمحش لنفسك تدخل فيها مهما خسرت لان اي خساره اهون من خساره نفسك
ولو اتكتب عليك انك تمر بها اعمل كل حاجه في الدنيا تخرجك منها قبل ما تتحول لزومبي مخيف لنفسك ولكل الي حواليه
حاسب وابعد عن مثلث برمودا بتاع حياتك. صدقني انت اهم واغلي واعلي من انك تستسلم للضياع
دكتوره / سحر عبدالعال حامد
