كل سنة وأنتم طيبين النهاردة عيد الحب كل سنة وكل الناس طيبين مرتبطين ولا سناجل أنا عايزه أقول إن كلمة عيد الحب أكيد مش مقصود بها الثنائيات
أو مجرد الناس المرتبطة
أكيد دي صورة جميلة من صور الحب ولكن هو ده بس الحب ؟
يا ترى لما حد يحس بحب أولاده له وأن ربنا أكرمه بالذرية الصالحة يا ترى ده مش حب ؟
يا ترىاللي عنده أم او أب عايشين وبيحبوه وبيسمع دعواتهم له كل يوم ده ما يستحقش يا ترى يبقي حب ؟
ما يستحقش منه انه يحتفل معاهم بعيد الحب ؟
يا ترى اللي عنده صديق او صديقة مخلصة وقت ما يحتاجهم يفضفض معاهم فيلاقي الراحة النفسية اللي بترجعه لصوابه أو استقراره النفسي ده ما يستحقش انه يحتفل معاهم بعيد الحب ؟
فكر كده في الإنسان اللي بيطلب من ربنا وربنا وفورا زي ما طلبها بالضبط يحققها له بس أحسن وأحلى وأيسر وأسهل يا تري ده ميستحقش يحس بالحب ده في عيد الحب ؟
في يوم عيد الحب بنستدعي الإحساس بالأمان والمودة والرحمة أين ما كانت العلاقة اللي فيها ده
حتى لو أنت حسيت إن أمانك والرحمة وودك يعني تحقيق آمالك وأحلامك بس في قربك من الله سبحانه وتعالى ده بردوه يخليك تحتفل بعيد الحب
وكل سنة وكل عيد حب واحنا كلنا طيبين وياريت اخواتنا بتوع حرام مفيش غير عيد الأضحى ولا الفطر معلش ميعلقوش عندي
لاني ما بقصدش العيد الديني احنا بنقصد العيد يعني فرحه وبهجه يعني يوم نتذكر فيه معاني معينة أحاسيس معينة بنحاول نجددها عشان متضيعش مننا وسط زحام مادية الحياه
ونحيي معاني معينة جميلة وراقية عشان ما تتوهش مننا في دوشة المشاكل والجري في سباق الحياه
وبصرف النظر عن عيد الحب ده اتعمل ليه ولا احتفلوا به إزاي مش مهم
المهم بس ان احنا هنعمل ايه
احنا حناخد كل حاجة حلوه وكل حاجة ايجابية حوالينا حتى لو كان السبب اللي اتعملت علشانه مختلف
وهنفضل بردوه قلوبنا مليانة حب وعطف ودد لكل الي حوالينا
وربنا يديمها علينا نعمة الاحساس والحب
دكتورة /سحر عبدالعال حامد
